Շատ է խոսվում այն մասին, որ կահույքի գույնը կարող է վիզուալ ընդարձակել կամ կրճատել սենյակի չափսերը, սենյակում ստեղծել թեթև կամ ծանր մթնոլորտ, սակայն երբեմն անտեսվում է այն կարևոր փաստը, որ կահույքի գույնը կարող է անդրադառնալ նաև մեր ինքնազգացողության վրա։
Կահույքը գույնը, իհարկե, մեծապես կախված է մեր ճաշակից, ինչու չէ, նաև կահույքի ժամանակակից տենդենցներից։ Սակայն մասնագետները, ինտերիեր դիզայներները խորհուրդ են տալիս ավելի կարևորել կահույքի գույների հոգեբանական կողմը և ընտրել այնպիսի գույների կահույք, որոնք կարող են դրական ազդել հանգստի վրա։
Դիտարկենք կահույքի ամենատարածված գույների բնութագրերը և դրանց ազդեցությունը մեր ինքնազգացողության վրա․
Սպիտակ
Սպիտակը ստիպում է մշտապես հետևել ինչպես սենյակի, այնպես էլ մեր մտքերի կոկիկությանը, օգնում է հավաքել մտքերը, կենտրոնանալ աշխատանքի վրա, լցվել էներգիայով։ Լավ է ազդում մեր տեսողության վրա, քանի որ լուսավորում է սենյակը։ Այս գույնի կահույք սովորաբար ընտրում են ինքնավստահ, վճռական և զուսպ մարդիկ։ Սպիտակ գույնի կահույքով կահավորված սենյակում կարող է տիրել խաղաղ, բարի տրամադրություն։ Սակայն պետք է չտարվել անսահման սպիտակով և հիվանդասենյակի տպավորություն չստեղծելու համար անհրաժեշտ է սպիտակ կահույքը համադրել այլ գույներով։
Սև
Սև կահույքը էլեգանտ տպավորություն է թողնում, սենյակին հաղորդում պատկառելի տեսք։ Այս գույնը հիմնականում ընտրում են վճռական, ինքնավստահ մարդիկ։ Սակայն պետք է խուսափել այս գույնի կահույքի չարաշահումից, քանի որ այն կարող է ազդել մարդու հոգեվիճակի վրա, առաջ բերելով թախիծ, դեպրեսիվ տրամադրություն։ Ուստի բացասական էֆեկտ չստանալու համար կարելի է բազմոցի սև գույնը «կոտրել» ավելի վառ գույների բարձերով։
Մոխրագույն
Թե՛ մոխրագույն կահույքը, թե՛ մոխրագույն պատերը մինիմալիզմի լավագույն դրսևորումներն են և միշտ լավ համադրություն են կազմում այլ, հատկապես վառ գույների հետ։ Այս գույնը օգնում է լիցքաթափվել, գալ հավասարակշռության, կենտրոնանալ աշխատանքի վրա։ Նախընտրելի է թե՛ տան, թե՛ աշխատասենյակի համար։
Դարչնագույն
Դարչնագույնը հողի գույնն է և կահույքի համար համարվում է դասական գույն։ Այդ է պատճառը, որ դարչնագույնով կահույքով շրջապատված մենք դառնում ենք ավելի ինքնավստահ, ողջամիտ, իսկ միջավայրը՝ հուսալի, ստաբիլ։ Դարչնագույնը, ինչպես մոխրագույնը, օգնում է կենտրոնանալ, հարմարավետ զգալ։ Չնայած այս ամենին, դարչանգույնը ծանր գույն է, և այն, ինչպես սևը, անհրաժեշտ է դարձնել ավելի թեթև՝ համադրելով ավելի վառ կամ բաց գույնի աքսեսուարներով կամ դետալներով։
Ձեր հարցերն ու մեկնաբանությունները կարող եք ուղարկել մեզ Facebook-ում և Instagram-ում։